Það var í Miðnæturhlaupi Suzuki 2012 sem þátttakendum stóð í fyrsta sinn til boða að taka þátt í hálfmaraþoni. Þá tóku 159 hlauparar þátt en undanfarin ár hafa um 1.000 hlauparar skráð sig.
Hlaupaleiðin
Hlaupaleiðin er bæði skemmtileg og krefjandi. Hlaupið hefst fyrir framan Laugardalshöllina en eftir það er að mestu hlaupið á stígum. Þegar hlauparar koma úr Laugardalnum hlaupa þeir í gegnum hið rótgróna hverfi Vogahverfi, eftir Gnoðarvogi. Því næst er haldið yfir Skeiðarvogsbrúnna og beygt inn Sogaveg, niður í Stjörnugróf og yfir í Elliðaárdalinn. Hlaupið er meðfram Elliðaánum alla leið upp Elliðaárdalinn og framhjá svæði Fáks í Víðidal. Þaðan er farið upp að Rauðavatni og Morgunblaðshúsinu og leggja hlauparar leið sína í gegnum golfvöllinn Grafarholtsvöll. Úr Grafarholtinu halda hlauparar niður Grafarvoginn, í gegnum bryggjuhverfið í Grafarvogi og fara svo göngustíginn meðfram Rauðagerði og yfir göngubrúnna við Miklubraut inn á göngustíg við Suðurlandsbraut og aftur inn í Laugardalinn þar sem hlaupinu lýkur.
Hlaupaleiðin er mæld samkvæmt stöðlum AIMS (alþjóðleg samtök hlaupa).
Smelltu hér til að skoða kort af leiðinni.
Drykkjarstöðvar
Í Miðnæturhlaupi Suzuki eru í heildina fjórar drykkjarstöðvar og eru þær staðsettar á um það bil 5 km fresti. Á öllum drykkjarstöðvunum verður í boði Gatorade og vatn. Fyrsta drykkjarstöðin er upp við stíflu í Elliðaárdal eftir um það bil 5 km. Þessi drykkjarstöð er bæði fyrir þátttakendur í hálfmaraþoni og 10 km hlaupi. Eftir um það bil 10 km í hálfmaraþoninu er drykkjarstöð við Morgunblaðshöllina við Rauðavatn. Á þessari drykkjarstöð verða í boði bananar auk fyrrnefndra drykkja. Í bryggjuhverfinu við Gullinbrú þegar þátttakendur í hálfmaraþoni hafa hlaupið um það bil 15 km er drykkjarstöð. Að lokum er drykkjarstöð í markinu þar sem þátttakendur allra vegalengda geta svalað þorstanum.
Sjá frekari upplýsingar hér á korti.
Þátttakendur
Öll sem eru 15 ára og eldri geta skráð sig og tekið þátt í hálfmaraþoni Miðnæturhlaups Suzuki. Ekki er mælt með því að óvanir hlauparar taki þátt í þessari vegalengd. Athugið að tímamörk í hlaupinu eru 3 klukkustundir.
Salernisaðstaða
Þátttakendur í Miðnæturhlaupi Suzuki geta komist á salerni í Laugardalshöll en einnig eru færanleg salerni/kamrar á rás- og marksvæði, við stífluna í Elliðaárdal (eftir u.þ.b. 5 km) og á golfvellinum í Grafarholti (eftir u.þ.b. 11 km).
Algengar spurningar
Vantar þig fleiri upplýsingar um Miðnæturhlaupi Suzuki? Svör við algengum spurningum má finna hér.
