Þjónusta á hlaupdag

Í Miðnæturhlaupi Suzuki eru í heildina fjórar drykkjarstöðvar og eru þær staðsettar á um það bil 5 km fresti. Á öllum drykkjarstöðvunum verður í boði Gatorade og vatn. 

• Eftir 5 km - við stíflu í Elliðaárdal.
• Eftir 10 km - við Morgunblaðshöllina við Rauðavatn (bananar í boði ásamt drykkjum).
• Eftir 15 km - Í bryggjuhverfinu við Gullinbrú.
• Endamark - Að lokum er drykkjarstöð í markinu þar sem þátttakendur allra vegalengda geta svalað þorstanum.

Smelltu hér til að kynna þér nánar staðsetningar drykkjarstöðvanna.

Töskugeymsla er staðsett í Skautahöllinni. Þar geta þátttakendur komið tösku fyrir í geymslu gegn gjaldi. Á hlaupanúmerinu er sérstakur miði sem skal festa við tösku. Starfsfólk vaktar geymsluna en þó er engin ábyrgð tekin á fjármunum sem þar eru geymdir. Athugið að aðeins er hægt að geyma eina tösku á hvern hlaupara. Opnunartími töskugeymslu er frá kl. 19:00-00:00.

Sjálfvirk tímataka er í hlaupinu. Notaður verður tímatökubúnaður sem samanstendur af mottum í rásmarki sem hlauparar fara yfir í byrjun og enda hlaups en tímatökuflagan er innbyggð í hlaupanúmerinu hjá hverjum og einum.

Þátttakendur í öllum vegalengdum hlaupa á mismunandi hraða. Þar sem fjöldinn er mikill og til að forðast þrengsli, árekstra og frammúrtöku á fyrstu kílómetrunum, er mikilvægt að þátttakendur áætli hlaupahraða sinn og velji viðeigandi hraðahólf.

Frekari upplýsingar má sjá hér.

Allir þátttakendur í Miðnæturhlaupi Suzuki fá verðlaunapening. Fyrstu einstaklingar í karla-, kvenna- og kváraflokki með keppnismiða fá verðlaun og gjafir frá samstarfsaðilum hlaupsins. Að auki fá sigurvegarar í hálfu maraþoni peningaverðlaun. Einnig eru veitt aldursflokkaverðlaun fyrir þátttakendur með keppnismiða en þau verða send í tölvupósti í vikunni eftir hlaup.

Að minnsta kosti þrír í hverjum flokki verða að ljúka hlaupi til að það teljist til keppni.

Sjá nánar um verðlaun hér.

Um 100 starfsmenn starfa við brautargæslu á hlaupadag. Þau sjá um að vísa hlaupurum veginn og stýra umferð. Hlauparar eiga að kynna sér vel hlaupaleiðina hér því starfsmenn eru ekki sjáanlegir á hluta leiðarinnar t.d. á beinum köflum.

Færanleg salerni verða við start og marksvæði, einnig á hlaupaleið, sjá nánar hér.

Hjúkrunarfræðingur er til taks á marksvæði og veitir fyrstu hjálp. Hringt er á sjúkrabíl í neyðartilvikum. Mælt er með því að hlauparar skrifi nafn og símanúmer aðstandanda sem hægt er að hafa samband við í neyð aftan á hlaupanúmerið.

Eftir hlaupið er öllum þátttakendum boðið frítt í Laugardalslaugina í sundlaugarpartý. Hleypt verður ofan í laugina til kl. 00:30 og allir þurfa að fara uppúr eigi síðar en kl. 00:45. 

Framvísa þarf hlaupanúmeri til að fá aðgang að lauginni. Sundlaugin er líka opin almenningi gegn gjaldi. Upplýsingar um aðstöðuna í Laugardalslaug má finna hér.

Eftir hlaupið verður hægt að nálgast óskilamuni á skrifstofu Íþróttabandalags Reykjavíkur á Engjavegi 6, 104 Reykjavík. Skrifstofan er opin alla virka daga frá kl. 09:00-15:00. Óskilamunum verður fargað 2 vikum eftir hlaupadag séu þeir ekki sóttir.

Ljósmyndarar verða á svæðinu og reyna að ná myndum af sem flestum þátttakendum í hlaupinu.